Colors: Orange Color

മാനേ പുള്ളിമാനേ....
നാട്ടിലെത്തിയ പുള്ളിമാൻ ഉല്ലാസത്തിലാണ്
പത്തനംതിട്ട
''മാനേ...പുള്ളിമാനേ കാട്ടിൽനിന്ന് നാട്ടിലെത്തിയ പുള്ളിമാൻ ഉല്ലാസത്തിലാണ്. പുള്ളിമാൻ എല്ലാവരുടെയും ഹൃദയം കവർന്ന് ഓമല്ലൂരിൽ ഓടിച്ചാടി കളിക്കുന്നു. ആടും പശുവും പോത്തുമെല്ലാം ഉറ്റ ചങ്ങാതിമാർ. ആളനക്കം കണ്ടാൽ കുറ്റിക്കാട്ടിൽ ഒളിക്കും. ഓട്ടം കണ്ടാൽ വായുവിൽ പറക്കുംപോലെ.
ലോക്ഡൗണിനിടെ ആരുടെയും കണ്ണിൽ പെടാതെയാണ് ഓമല്ലൂരിൽ എത്തിയത്. നാട്ടുകാർക്ക് കൗതുകമുണർത്തിയ അതിഥിയെ പറ്റി ആദ്യദിവസം തന്നെ മാധ്യമങ്ങൾ റിപ്പോർട്ട് ചെയ്തിരുന്നു. ഇതിനുശേഷം പുള്ളിമാനെ കാണാൻ നിരവധി ആളുകൾ എത്തുന്നുണ്ട്.
ഇരുപത് ദിവസം മുൻപ് കൊടുന്തറയിലാണ് ആദ്യം പ്രത്യക്ഷപ്പെടുന്നത്. ഇപ്പോൾ ഓമല്ലൂർ ചന്തക്ക് സമീപം ഒഴിമണ്ണിൽ സൺഡേ സ്‌കൂൾ പരിസരത്ത് സമൃദ്ധമായി പുല്ലുവളർന്നു നിൽക്കുന്ന പറമ്പിൽ ഉല്ലസിച്ച് കഴിയുന്നു. തുറസായ പുൽമേടുകളിലും അർധവനങ്ങളിലും കാണപ്പെടുന്ന പുള്ളിമാൻ ഇവിടെയെത്തിയത് ഏറെ കൗതുകമുണർത്തി. വയനാട് ജില്ലയിലാണ് ഇവയെ കൂടുതലും കാണുന്നത്. ഓമല്ലൂരിലെത്തിയ പുള്ളിമാൻ തെന്മല വനമേഖലയിൽനിന്ന് വന്നതാണെന്ന് കരുതുന്നു. റാന്നി വനം ഡിവിഷനിൽനിന്ന് ദിവസേന രാവിലെയും വൈകുന്നേരവും നിരീക്ഷണവും നടത്തുന്നുണ്ട്.
പുള്ളിമാനിന് എന്തെങ്കിലും സംഭവിച്ചാൽ വന്യജീവി നിയമപ്രകാരം കേസെടുക്കുമെന്നും കടുത്ത ശിക്ഷാ നടപടി ഉണ്ടാകുമെന്നും അധികൃതർ പറഞ്ഞു.

 

അനുബന്ധ വെബിനാറുകൾ തുടങ്ങി
ശാസ്ത്രസാഹിത്യ പരിഷത് ജില്ലാ സമ്മേളനം 18ന് തുടങ്ങും

കണ്ണൂർ
ശാസ്ത്രസാഹിത്യ പരിഷത് ജില്ലാ സമ്മേളനം 18,19, 20 തീയ്യതികളിൽ നടക്കും. ഗൂഗീൾ മീറ്റ് വഴി നടക്കുന്ന സമ്മേളനത്തിന്റെ ഉദ്ഘാടനം 18ന് വൈകീട്ട് ഏഴിന് ഡോ ബി ഇക്ബാൽ നിർവഹിക്കും. ഏകലോകം ഏകാരോഗ്യം എന്ന വിഷയം അവതരിപ്പിക്കും. 14 മേഖലാ സമ്മേളനങ്ങളിൽ നിന്ന് തെരഞ്ഞെടുത്ത 300 പ്രതിനിധികൾ സമ്മേളനത്തിൽ പങ്കെടുക്കും. അനുബന്ധമായി 14 വെബ്ബിനാറുകൾ നടക്കും.
സ്ത്രീ ശാക്തീകരണത്തിന്റെ പുതിയ മാനങ്ങൾ എന്ന വിഷയത്തിൽ നടന്ന വെബ്ബിനാറിൽ പി സൗമിനി വിഷയാവതരണം നടത്തി. എൻ സുകന്യ, ഡോ സി ചിഞ്ചു, ഡോ ദീപാ ചന്ദ്രൻ, അഡ്വ ഇ സിന്ധു, പിഎസ് ജൂന, എം വിജയകുമാർ, പിവി രഹ്ന എന്നിവർ സംസാരിച്ചു. വി ചന്ദ്രബാബു മോഡറേറ്ററായി.
ചൊവ്വാഴ്ച പ്രാദേശിക ഇടപെടൽ സാധ്യതകൾ എന്ന വിഷയത്തിൽ പിഎ തങ്കച്ചനും കോവിഡ് പ്രതിസന്ധിയും സ്‌കൂൾ വിദ്യാഭ്യാസവും എന്ന വിഷയത്തിൽ ഡോ പിവി പുരുഷോത്തമനും അവതരണം നടത്തും. ബുധനാഴ്ച ഉന്നത വിദ്യാഭ്യാസം ഓൺലൈനിൽ എന്ന വിഷയത്തിൽ നടക്കുന്ന പരിപാടിയിൽ ഡോ കെ എം അനിൽകുമാർ, ഡോ ബിനിത തമ്പി എന്നിവർ വിഷയാവതരണം നടത്തും.

 

 

വിളകൾ നട്ടുവളർത്താൻ ഉചിതമായ കാലാവസ്ഥ
തിരുവാതിര ഞാറ്റുവേല ജൂൺ 21 ന് തുടങ്ങും
സ്വന്തം ലേഖകൻ
കേരളത്തിലെ കാർഷിക മേഖലയ്ക്ക് വരദാനമായ തിരുവാതിര ഞാറ്റുവേല ജൂൺ 21 ന് തുടങ്ങും. ഫലവൃക്ഷത്തൈകളും ചെടികളും കാർഷിക വിളകളും നടാനും മാറ്റി നടാനും പറ്റിയ സമയമാണിത്. ഞാറ്റുവേലക്കാലത്ത് പെയ്യുന്ന മഴയിൽ വളക്കൂർ കൂടുതലുണ്ടെന്നാണ് കർഷകരുടെ വിശ്വാസം. അതുകൊണ്ട് ഞാറ്റുവേലയിൽ നടുന്നവയെല്ലാം നന്നായി തഴച്ചു വളരുകയും ചെയ്യും.തിരുവാതിര ഞാറ്റുവേലയുടെ പ്രത്യേകത തിരിമുറിയാതെ മഴ പെയ്യും എന്നുള്ളതാണ്. വെയിലും മഴയും ഒരേപോലെ കിട്ടുന്ന കാലമാണിത്. അതുകൊണ്ടു കൂടിയാണ് ചെടികൾ നടാൻ യോജിച്ച സമയമായി ഇത് മാറുന്നത്. കാലവർഷം കനത്തു കഴിഞ്ഞാൽ പിന്നെ കിട്ടുന്ന ഈ ഇടവേള മഴയുടെ ഊറ്റമില്ലാത്തതു കൊണ്ടും വെയിലിന്റെ കാഠിന്യമില്ലാത്തതു കൊണ്ടും ചെറുതായി തുടർച്ചയായി മഴ കിട്ടുന്നതു കൊണ്ടും കാർഷിക ജോലികൾക്ക് ഉത്തമമാണ്.

ഞായറിന്റെ (സൂര്യന്റെ) വേളയാണ് (സമയം) ഞാറ്റുവേലയായി മാറിയത്. ഒരു വർഷം ലഭിക്കുന്ന മഴയുടെ വിതരണത്തെയും സസ്യങ്ങളുടെ വളർച്ചയെയും സാമ്പ്രദായിക കൃഷി അനുഭവ പരിജ്ഞാനത്തെയും അടിസ്ഥാനപ്പെടുത്തിയാണ് ഞാറ്റുവേലകൾ കുറിച്ചുട്ടുള്ളത്. ഭൂമിയിൽ നിന്നും സൂര്യനെ നോക്കുമ്പോൾ സൂര്യൻ ഏതു നക്ഷത്രത്തിന്റെ അടുത്താണോ നിൽക്കുന്നത് അതാണ് ഞാറ്റുവേല എറിയപ്പെടുന്നത്. അതായത് സൂര്യന്റെ സ്ഥാനം തിരുവാതിര നക്ഷത്രത്തിലാണെങ്കിൽ അത് തിരുവാതിര ഞാറ്റുവേല. അങ്ങനെ അശ്വതി, ഭരണി, കാർത്തിക, രോഹിണി, മകീര്യം, തിരുവാതിര തുടങ്ങി രേവതി വരെയുള്ള ഇരുപത്തിയേഴ് നക്ഷത്രങ്ങളുടെ പേരിലാണ് ഞാറ്റുവേലകൾ അറിയപ്പെടുന്നത്. മറ്റു ഞാറ്റുവേലകളുടെ ശരാശരി ദൈർഘ്യം പതിമൂന്നര ദിവസമാണെങ്കിൽ തിരുവാതിരയുടേത് 15 ദിവസമാണ്. 27 ഞാറ്റുവേലകളിൽ 10 എണ്ണം നല്ല മഴ ലഭിക്കുവയാണ്. ഞാറ്റുവേല രാത്രി പിറക്കണമൊണ് പഴമക്കാർ പറയുന്നത്. 'രാത്രിയിൽ വരും മഴയും രാത്രിയിൽ വരും അതിഥിയും പോകില്ലെന്ന് അവർക്ക് പഴഞ്ചൊല്ലുമുണ്ടായിരുന്നു. പകൽ പിറക്കു ഞാറ്റുവേകളിൽ പിച്ചപ്പാളയെടുക്കാമെന്നും അവർക്കറിയാമായിരുന്നു. മഴ തീരെ കുറവായിരിക്കുമെന്നർത്ഥം.

തിരുവാതിര ഞാറ്റുവേലയും കുരുമുളകുമായുള്ള അഭേദ്യമായ ബന്ധം വെളിപ്പെടുത്തുന്ന ഒരു കഥ ഇങ്ങനെയാണ്. പണ്ട് സാമൂതിരിയുടെ കാലത്ത് വാസ്‌കോ ഡ ഗാമയുടെ നേതൃത്വത്തിൽ പറങ്കികൾ കുരുമുളക് തൈകൾ പോർത്തുഗലിലേക്ക് കൊണ്ടുപോവാൻ സാമൂതിരിയോട് അനുവാദം ചോദിച്ചു. അതിന് അനുവാദം നൽകിയ സാമൂതിരി അവർ ചോദിച്ചത്ര തൈകൾ നൽകുകയും ചെയ്തു. ഇത് കണ്ട് ഭയന്ന മാങ്ങാട്ടച്ചൻ പറങ്കികൾ കുരുമുളക് കൊണ്ടുപോയാലുണ്ടാകുന്ന ഭവിഷത്ത് അറിയിച്ചപ്പോൾ 'അവർ നമ്മുടെ കുരുമുളക് തിരിയൽകളേ കൊണ്ട് പോകൂ നമ്മുടെ തിരുവാതിര ഞാറ്റുവേല കൊണ്ട് പോകില്ലല്ലോ' എന്നായിരുന്നത്രേ സാമൂതിരിയുടെ മറുപടി.
ഓരോ ഞാറ്റുവേലയിലും എന്തു നടണം എങ്ങനെ പരിപാലിക്കണമെന്നൊക്കെ കൃത്യമായി പറഞ്ഞിട്ടുണ്ട്.
അശ്വതി ഞാറ്റുവേല : ഏപ്രിൽ 14 മുതൽ ഏപ്രിൽ 27 വരെയുള്ള ദിവസങ്ങൾ ആണ് അശ്വതി

ഞാറ്റുവേല. ഈ സമയത്തു ഇരിപ്പൂനിലങ്ങളിൽ ഒന്നാം വിളയായി നെൽ കൃഷി ചെയ്യാം. വിത്ത് തേങ്ങ സംഭരിക്കുന്നതിനും, കുരുമുളക് കൃഷിക്കായുള്ള താങ്ങുകാലുകൾ പിടിപ്പിക്കുവാനും ഈ ദിവസങ്ങൾ പ്രയോജനപ്പെടുത്താം.
ഭരണി ഞാറ്റുവേല : ഏപ്രിൽ 27 മുതൽ മെയ് 10 വരെയുള്ള ഭരണി ഞാറ്റുവേലയ്ക്കു തേങ്ങ, പയർ തുടങ്ങിയവയുടെ കൃഷിയ്ക്ക് അനുയോജ്യമാണ്. ഈ കാലയളവിൽ ലഭിക്കുന്ന മഴയും വിളകളുടെ വളർച്ചക്ക് ഉത്തമമാണ്. പച്ചക്കറി ഇനങ്ങളായ വഴുതന, മുളക് തുടങ്ങിയവയും പാകി മുളപ്പിക്കാം കൂടാതെ പറമ്പുകളിൽ കൃഷിചെയ്യുന്ന നെല്ലിനങ്ങളായ ചാമ, മോടൻ എന്നിവയും വിതക്കാൻ പറ്റിയ അവസരമാണ് ഇത്.
കാർത്തിക ഞാറ്റുവേല: മെയ് 10 മുതൽ മെയ് 24 വരെ വരുന്ന ദിവസങ്ങളിൽ ഇരുപ്പൂനിലങ്ങളിൽ ഒന്നാം വിളയായി തയ്യാറാക്കിയിരിക്കുന്ന പൊടിഞ്ഞാറ് നടാം. വട്ടൻ വിതച്ച നെല്ലിന് കളപറിച്ച് വളം ചേർക്കാനും, പുതിയ കുരുമുളക് വള്ളികൾ നടാനും, പച്ചക്കറി നഴ്സറി തയ്യാറാക്കാനും ഈ അവസരം പ്രയോജനപ്പെടുത്താം. ഇഞ്ചി, മഞ്ഞൾ തുടങ്ങിയവയുടെ കൃഷിയും ഈ അവസരത്തിൽ ചെയ്യാം.
രോഹിണി ഞാറ്റുവേല : മെയ് 24 മുതൽ ജൂൺ 7 വരെ ദിവസങ്ങളാണ് തേങ്ങ പാകുന്നതിനും തെങ്ങ് വളം ചേർത്ത് തടം കോരുന്നതിനും നല്ലത്. പയർ, രായി എന്നിവ വിതക്കുന്നതിനും നാടൻ വാഴതൈയ് നടുന്നതിനും ഈ ഞാറ്റുവേലയിൽ സാധിക്കും.
മകയിരം ഞാറ്റുവേല : ജൂൺ 7 മുതൽ ജൂൺ 21 വരെയുള്ള കാലത്ത് പച്ചക്കറിക്കൾക്ക് വളപ്രയോഗം നടത്തുന്നതിനും, തെങ്ങ്, കവുങ്ങ്, റബർ തുടങ്ങിയവയുടെ തൈയ്കൾ നടുന്നതിനും നന്ന്.
തിരുവാതിര ഞാറ്റുവേല : ജൂൺ 21 മുതൽ ജുലൈ 3 വരെ യുള്ള കാലയളവാണ് തിരുവാതിര ഞാറ്റുവേല. ഏതു ചെടികളും നട്ടുവളർത്തന്നതിന് യോജ്യമായ ദിവസങ്ങളാണ് ഇത്. കുരുമുളക് ചെടിയുടെ പരാഗണം ഈ സമയത്താണ് നടക്കുന്നത്.
പുണർതം ഞാറ്റുവേല : ജൂലൈ 3 മുതൽ ജുലൈ 18 വരെയുള്ള പുണർതം ഞാറ്റുവേല ദിവസങ്ങൾ തിരുവാതിര ഞാറ്റുവേല പോലെത്തന്നെ ഉത്തമമാണ് ഈ ഞാറ്റുവേലകളിൽ ലഭിക്കുന്ന മഴയും തുടർന്ന് ഉറവ പൊട്ടി മണ്ണിലേക്ക് ലഭിക്കുന്ന ജലവും വിളകളുടെ വളർച്ചക്ക് അനുയോജ്യമാണ്. അമരവിത്ത് നടാൻ പറ്റിയ സമയവും ഇതാണ്.
പൂയം ഞാറ്റുവേല : ജുലൈ 18 മുതൽ ആഗസ്റ്റ് 3 വരെ പൂയയുള്ള പൂയം ഞാറ്റുവേലയിൽ മൂപ്പുകൂടിയ നെല്ലിനങ്ങൾ രണ്ടാം വിളയ്ക്കായി ഞാറിടാം. സുഗന്ധവ്യഞ്ജനവിളകൾക്ക് വളം ചേർക്കുന്നത് ഈ ദിവസങ്ങളിൽ ആയിരിക്കുന്നത് നല്ലതാണ്.
ആയില്ല്യം ഞാറ്റുവേല : ആഗസ്റ്റ് 3 മുതൽ ആഗസ്റ്റ് 16 വരെയുള്ള ദിവസങ്ങളിൽ ഇരിപ്പൂ നിലങ്ങളിൽ ഒരുപ്പൂവായി കൃഷി ചെയ്യുന്നതിനായി കരിങ്കൊറ (മൂപ്പേറിയ വിത്തിനങ്ങൾ) നടാൻ സാധിക്കും. നെല്ലിൻെ്റ വളപ്രയോഗത്തിനും പറ്റിയ അവസരമാണ് ഇത്.
മകം ഞാറ്റുവേല : എള്ള് കൃഷിക്ക് ഏറ്റവും അനുയോജ്യമായ ഞാറ്റുവേലയാണ് ആഗസ്റ്റ് 16 മുതൽ ആഗസ്റ്റ് 30 വരെയുള്ള മകം ഞാറ്റുവേല. കരനെല്ല് കൃഷിചെയ്യുന്ന പ്രദേശത്തു കൊയ്യത്തിന് ശേഷം എള്ള് കൃഷി ചെയ്യാം.
പൂരം ഞാറ്റുവേല : ആഗസ്റ്റ് 30 മുതൽ സെപ്തംബർ 13 വരെയുള്ള പൂരം ഞാറ്റുവേലയിൽ ഇരുപ്പൂ നിലങ്ങളിൽ ഒന്നാം വിളയുടെ കൊയ്ത്തിനു ശേഷം രണ്ടാം വിളയ്ക്കായി നിലം ഒരുക്കാം. വർഷകാല പച്ചക്കറി വിളവെടുപ്പും ഈ കാലയളവിലാണ്.
ഉത്രം ഞാറ്റുവേല : സെപ്തംബർ 13 മുതൽ 26 വരെയുള്ള ഞാറ്റുവേലയിൽ രണ്ടാം വിളയായി നെൽകൃഷി ആരംഭിക്കാം.
അത്തം ഞാറ്റുവേല : സെപ്തംബർ 26 മുതൽ ഒക്ടോബർ 10 വരെയുള്ള അത്തം ഞാറ്റുവേലയിൽ രണ്ടാം വിളയ്ക്ക് വേണ്ടത്ര ജലം ലഭിക്കാത്ത സ്ഥലങ്ങളിൽ എള്ള്, മുതിര എന്നിവയുടെ കൃഷി ആരംഭിക്കാം. അത്തം ഞാറ്റുവേല അവസാനിക്കുന്നതിനു മുൻപ് രണ്ടാം വിളയായി ചെയ്യുന്ന നെൽകൃഷിയുടെ ഞാറുനടൽ തീർന്നിരിക്കണം. കൂടാതെ കുരുമുളക് ചെടിയുടെ വള്ളികൾ താങ്ങുകാലുകളോട് ചേർത്ത് കെട്ടാം.
ചിത്തിര ഞാറ്റുവേല : ഒക്ടോബർ 10 മുതൽ 23 വരെയുള്ള ചിത്തിര ഞാറ്റുവേലയിൽ നേന്ത്രവാഴ കൃഷി ചെയ്യുന്നതിനും, തെങ്ങ, കവുങ്ങ് തുടങ്ങിയ നാണ്യവിളവുകൾക്ക് വളം ചേർക്കുന്നതിനും, കാവത്ത്, കിഴങ്ങ് എന്നിവയുടെ വിളവെടുക്കുന്നതിനും അനുയോജ്യമാണ്.
ചോതി ഞാറ്റുവേല : ഒക്ടോബർ 23 മുതൽ നവംബർ 6 വരെയുള്ള ചോതി ഞാറ്റുവേലയിൽ പയർ കൃഷി ചെയ്യുന്നതിനും രണ്ടാംവിളയായ നെല്ലിന് വളം ചേർക്കുന്നതിനും അനുയോജ്യമാണ്. ഈ ഞാറ്റുവേലയിൽ മഴയുടെ ലഭ്യതയ്ക്കു ഗണ്യമായ കുറവ് വരാം.
വിശാഖം ഞാറ്റുവേല : നവംബർ 6 മുതൽ 19 വരെ കൃഷി സ്ഥലം കിളച്ച് മണ്ണിന്റെ ഈർപ്പം നിലനിർത്താൻ ശ്രമിക്കണം.
അനിഴം ഞാറ്റുവേല : നവംബർ 19 മുതൽ ഡിസംബർ 2 വരെയുള്ള കാലയളവിൽ വേനൽക്കാല പച്ചക്കറിക്കുള്ള നേഴ്സറി തയ്യാറാക്കാം
തൃക്കേട്ട ഞാറ്റുവേല : ഡിസംബർ 2 മുതൽ 15 വരെ വരുന്ന ഞാറ്റുവേലയിൽ നെല്ലിന് ഉണ്ടാകാൻ സാധ്യതയുള്ള ചാഴിശല്യത്തിനെതിരെ പ്രതിവിധിമാർഗ്ഗങ്ങൾ സ്വീകരിക്കാം. കൂടാതെ ഉയർന്ന നിലങ്ങളിലെ മുണ്ടകൻ കൊയ്യത്തിനും കോൾനിലങ്ങളിലെ പുഞ്ചകൃഷിക്കുമുള്ള അവസരമാണ്.

മൂലം ഞാറ്റുവേല : ഡിസംബർ 15 മുതൽ 28 വരെ മുണ്ടകൻ കൊയ്ത്ത് കാലമാണ്.
പൂരാടം ഞാറ്റുവേല : ഡിസംബർ 28 മുതൽ ജനുവരി 10 വരെയുള്ള കാലത്ത് വേനൽ നന ആരംഭിക്കണം.
ഉത്രാടം ഞാറ്റുവേല : ജനുവരി 10 മുതൽ 23 വരെയുള്ള സമയം പയർ, വെള്ളരി, മത്തൻ, കുമ്പളം, ചീര എന്നിവരുടെ കൃഷിക്ക് അനുയോജ്യമാണ്.
കൂടാതെ വേനൽക്കാലപച്ചക്കറി കൃഷിക്കുള്ള ജലലഭ്യത ഉറപ്പുവരുത്തണം.
തിരുവോണം ഞാറ്റുവേല : ജനുവരി 23 മുതൽ ഫെബ്രുവരി 5 വരെയുള്ള കാലയളവിന് ശേഷം പാടത്ത് പച്ചക്കറി കൃഷി ഉത്തമമല്ല.
അവിട്ടം ഞാറ്റുവേല : ഫെബ്രുവരി 5 മുതൽ 18 വരെയുള്ള അവിട്ടം ഞാറ്റുവേലയിൽ വിത്ത് തേങ്ങ സംഭരിക്കാം. നേന്ത്ര വഴക്കുള്ള നന ഒഴിവാക്കാം.
ചതയം ഞാറ്റുവേല : ചേന, കാവത്ത്, കിഴങ്ങ് തുടങ്ങിയവയുടെ കൃഷിക്ക് അനുയോജ്യമായ കാലമാണ് ഫെബ്രുവരി 18 മുതൽ മാർച്ച് 4 വരെയുള്ള ചതയം ഞാറ്റുവേല.
പൂരോരുട്ടാതി ഞാറ്റുവേല : മാർച്ച് 4 മുതൽ 17 വരെയുള്ള കാലത്ത് വിളകൾ എല്ലാം നനയ്ക്കണം.
ഉത്രട്ടാതി ഞാറ്റുവേല : പുഞ്ചകൊയ്ത്ത് നടത്താനും വിത്ത് തേങ്ങ സംഭരിക്കാനും പറ്റിയകാലമാണ് മാർച്ച് 17 മുതൽ 30 വരെയുള്ള ഈ ഞാറ്റുവേല.
രേവതി ഞാറ്റുവേല : മാർച്ച് 30 മുതൽ ഏപ്രിൽ 14 വരെ ഒന്നാം വിളയ്ക്കായി ഉഴിതിട്ട നിലം വീണ്ടും ഉഴിത്ത് കായാനിടാം ഇത് തുടർവർഷത്തെ കൃഷിയിലെ വിളവ് വർദ്ധിപ്പിക്കും.

 

കരനെൽകൃഷി വിജയിപ്പിക്കാം

എം കെ പി മാവിലായി
മഴക്കാലങ്ങളിൽ പറമ്പുകളിൽ ചെയ്യുന്ന നെൽ കൃഷി പൊതുവെ കരകൃഷി, പറമ്പു കൃഷി, മോടൻ കൃഷി എന്നീ പേരുകളിലാണ് അറിയപ്പെടുന്നത്. ഏറ്റവും അനുയോജ്യമായ നെല്ലിനങ്ങൾ തെരഞ്ഞെടുക്കുക എന്നത് കൃഷിയുടെ വിജയത്തിന് അത്യന്താപേക്ഷിതമാണ്. വരൾച്ചയെ പ്രതിരോധിക്കുവാനുള്ള കഴിവ്, വർധിച്ച ഉൽപ്പാദന ശേഷി, താരതമ്യേന മൂപ്പ് കുറവ്, മികച്ച കീട-രോഗപ്രതിരോധ ശേഷി , ഒരു പരിധിവരെ കളകളെ അതിജീവിച്ച് വളരാനുളള കരുത്ത് എന്നിവ പ്രധാന ഘടകങ്ങളാണ്. കേരള കാർഷിക സർവ്വകലാശാല ശുപാർശ ചെയ്യുന്നതും പരമ്പരാഗത കർഷകരുടെ അനുഭവങ്ങളിലൂടെ മികച്ചതെന്ന് കണ്ടെത്തിയതുമായ ഇനങ്ങളാണ് താഴെ കാണിച്ചവ.
അന്നപൂർണ്ണ , ഐശ്വര്യ, മട്ടത്രിവേണി, സ്വർണ്ണ പ്രഭ, രോഹിണി, ഹർഷ , വൈശാഖ്, രമണി ക, കാർത്തിക, അരുണ, ചിങ്ങം, ഓണം, രേവതി, മകം, വർഷ , ജ്യോതി, സംയുക്ത , കട്ടമോടൻ,കറുത്ത മോടൻ, ചുവന്ന മോടൻ, സുവർണ മോടൻ,കൊച്ചു വിത്ത്, കരുവാള ,ചിറ്റേനി, ചെങ്കയമ, ചീര, ചെമ്പാൻ, വെളിയൻ, ഞവര, പാൽക്കയമ, അരി മോടൻ എന്നിവ. ഇതിന് പുറമെ ഔഷധ നെല്ലിനമായ ഞവരനെല്ലും കരകൃഷിയിൽ മികച്ച വിളവ് നൽകുന്നതായി കണ്ടിട്ടുണ്ട്.
കരകൃഷിക്ക് തെരഞ്ഞെടുത്ത സ്ഥലം കാലേക്കൂട്ടി ഉഴുത് മറിച്ചോ, കൊത്തിക്കിളച്ചോ പരുവപ്പെടുത്തി കളകൾ പൂർണ്ണമായും നീക്കം ചെയ്തു നിരപ്പാക്കിയിടണം. മണ്ണ് നല്ല വളക്കൂറുളതാക്കി മാറ്റണം. പാകം വന്ന കംബോസ്റ്റ് , കാലിവളം ചാണകപ്പൊടി, തുടങ്ങി ചെലവ് കുറഞ്ഞ രീതിയിൽ ലഭ്യമാകുന്ന ജൈവ വളങ്ങൾ ഒരു സെന്റ് സ്ഥലത്തേക്ക് 20 കി.ഗ്രാം എന്ന കണക്കിന് ചേർത്താൽ നന്നായി. ഒരു സെന്റ് സ്ഥലത്തേക്ക് ഒരു കി.ഗ്രാം മുതൽ രണ്ട് കി.ഗ്രാം വരെ കുമ്മായം ചേർക്കുന്നത് മണ്ണിലെ പുളിരസം കുറക്കാൻ ഉപകരിക്കും.
പുതുമഴ ലഭിച്ചു കഴിഞ്ഞാൽ വിത്ത് വിതക്കാം. വിത്ത് വാരി വിതക്കുന്നത് കരകൃഷിക്ക് അത്ര യോജിച്ചതല്ല. ഇങ്ങനെ ചെയ്താൽ കരകൃഷിയിലെ കളകളെ നീക്കം ചെയ്യൽ എളുപ്പമാകില്ല. വിത്ത് നിർദ്ദിഷ്ട അകലം നൽകി നുരി വെക്കുന്നതാണ് നല്ലത്. ഒരു സെന്റ് സ്ഥലത്തേക്ക് 25 ഗ്രാംഎന്ന തോതിൽ വിത്ത് ആവശ്യമായി വരും. ഒരു കി.ഗ്രാം വിത്തിന് 10 ഗ്രാം എന്ന നിരക്കിൽ സ്യൂഡോമോണാസ് എന്ന ജീവാണുവളം വിത്തുമായി യോജിപ്പിച്ച് നന്നായി കുഴച്ചതിനു ശേഷം തണലത്ത് 12 മണിക്കൂർ സൂക്ഷിച്ച ശേഷം നുരിയിടുന്നത് ചെടിയുടെ ആരോഗ്യകരമായ വളർച്ചക്ക് ഉപകരിക്കും. കരകൃഷിയിലെ
പ്രധാന ശല്യം കളകളുടെ അമിതമായ വളർച്ചയാണ്. വളർച്ചയുടെ ആദ്യഘട്ടങ്ങളിൽ തന്നെ കളകളെ കഴിയുന്നതും വേരടക്കം പിഴുതെടുത്ത് നശിപ്പിക്കണം. നല്ലതുപോലെ വളക്കൂറ് വരുത്തിയ സ്ഥലങ്ങളിൽ പ്രത്യേകിച്ച് രാസവളപ്രയോഗമൊന്നും ആവശ്യമായി വരാറില്ല.
കേരള കാർഷിക സർവ്വകലാശാല ഒരു സെന്റ് സ്ഥലത്തെ നാടൻ, പരമ്പരാഗത നെല്ലിനങ്ങൾക്ക് 160 ഗ്രാം നൈട്രജൻ, 80 ഗ്രാം വീതം ഫോസ്ഫറസ്, പൊട്ടാഷ് എന്നിവ നൽകാൻ ശുപാർശ ചെയ്യുന്നുണ്ട്. ഉൽപ്പാദന ക്ഷമതയുളള മൂപ്പ് കുറഞ്ഞ ഇനങ്ങൾക്ക് ഒരു സെന്റ് സ്ഥലത്തേക്ക് യഥാക്രമം നൈട്രജൻ, ഫോസ്ഫറസ്, പൊട്ടാഷ് എന്നിവ 280 ഗ്രാം, 140 ഗ്രാം, 140 ഗ്രാം എന്നീ തോതിൽ നൽകുന്നത് വിളവ് പരമാവധി വർദ്ധിപ്പിക്കുവാൻ സഹായിക്കുമെന്ന് നിർദ്ദേശിക്കുന്നു.
ജൈവ രീതിയിൽ മോടൻ കൃഷി അവലംബിക്കുന്ന വർ ജീവാമൃതം, എഗ്ഗ് അമിനോ ആസിഡ്, ഫിഷ് അമിനോ ആസിഡ് എന്നീ വളർച്ചാ ത്വരകങ്ങൾ തയ്യാറാക്കി പ്രയോഗിക്കുന്നത്
രാസവളങ്ങൾ ഉപയോഗിക്കാത്തതു കൊണ്ടുളള പോഷക പോരായ്മ പരിഹരിക്കുന്നതിന് സഹായകമാകും.
പിണ്ണാക്ക് വളങ്ങൾ പുളിപ്പിച്ച് നേർപ്പിച്ചത്, ഗോമൂത്രം ഏഴിരട്ടി വെളളം ചേർത്ത് നേർപ്പിച്ചത് എന്നിവ തളിച്ചു കൊടുക്കുന്നതും വളർച്ചയെ പ്രോത്സാഹിപ്പിക്കാൻ ഉപകരിക്കും.

നെല്ലിൽ കതിർവരുന്ന സമയത്ത് കരകൃഷിയിൽ ചാഴിശല്യം രൂക്ഷമാകാറുണ്ട്.
ഇതിനെതിരെ വിഷപ്രയോഗം പാടില്ല. ഇവയെ ഫലപ്രദമായി നിയന്ത്രിക്കാൻ നമുക്ക് തന്നെ ഒരു മരുന്ന് തയ്യാറാക്കാം.
കോഴിമുട്ട ഒരെണ്ണം തോട് മാറ്റി അടിച്ചെടുത്ത് നാല് ദിവസം പുളിക്കാൻ വെക്കുക. ഇത് 25 ലിറ്റർ വെള്ളം ചേർത്ത് തളിച്ച് കൊടുക്കണം.

 

നാട്ടുമാവുകൾക്കായി ഒരു മാനിഫെസ്റ്റോ
ഇ.കെ.സോമശേഖരൻ
പഴങ്ങളിലെ രാജാവാണ് മാങ്ങ. ഇന്ത്യയുടെ ദേശീയഫലമെന്ന സ്ഥാനവും മാങ്ങയ്ക്കുണ്ട്. ലോകരാജ്യങ്ങളിൽ, ഏഷ്യയിലെ വിവിധ രാജ്യങ്ങളിലാണ് മാവ് കൂടുതലായി കാണപ്പെടുന്നത്. അതിൽ തന്നെ ഇന്ത്യയിലാണ് ഏറ്റവും കൂടുതൽ മാവ് കൃഷിചെയ്യുന്നത്. ഇന്ത്യയിലെ രാജാക്കന്മാർ മാവ് കൃഷി പ്രോത്സാഹിപ്പിച്ചിരുന്നുവെന്ന് ചരിത്രം പറയുന്നു. മുഗൾ രാജാവായിരുന്ന അക്ബർ ലാൽബാഗ് എന്ന പേരിൽ ആയിരക്കണക്കിന് മാവുകളുള്ള ഒരു തോട്ടം നട്ടുവളർത്തിയതായി ചരിത്രകാരന്മാർ രേഖപ്പെടുത്തിയിട്ടുണ്ട്. കാടുകളിൽനിന്ന് വീട്ടുപറമ്പുകളിലേക്ക് മാറ്റി മാവ് കൃഷി ആരംഭിച്ചത് ബി.സി. 2000 ആണ്ടിലാണെന്ന നിഗമനങ്ങൾ ചില ചരിത്രകാരന്മാർ മുന്നോട്ടു വെച്ചിട്ടുണ്ട്. ഇന്ത്യയുടെ വടക്കുകിഴക്കൻ മേഖലയിലാണ് ആദ്യമായി മാവ് കാണപ്പെട്ടതെന്ന നിരീക്ഷണമാണ് പ്രബലം മാവിന്റെ ഉല്പത്തിയെക്കുറിച്ച് വിപുലമായ
ഗവേഷണം നടത്തിയ എസ്.ആർ. മുഖർജി, മാവിന്റെ ജനിതക രൂപമായ മാംജിഫെറ ഉത്ഭവിച്ചത് ബർമ, സയാം, ഇന്തോചൈന എന്നിവിടങ്ങളിലാവാമെന്ന അഭിപ്രായക്കാരനാണ്. മേഘാലയത്തിലെ ധർമലഗിരിയിൽനിന്ന് കണ്ടെടുത്ത മാവിൻ ഫോസിലുകളിൽ കാർബൺ ഡേറ്റിങ് നടത്തിയപ്പോൾ അവയ്ക്ക് 60
മില്യൻ (1 മില്യൻ = 106) വർഷത്തെ പഴക്കമുണ്ടെന്നാണ് കണ്ടെത്തിയത്.
മാവ്, മാങ്ങ ചില വസ്തുതകൾ
2021 ലെ കണക്കനുസരിച്ച് ഏകദേശം 57 മില്യൻ ടൺ മാങ്ങയാണത്രേ ലോകത്തിലെ പ്രതിവർഷ ഉല്പാദനം. ഇതിൽ 25.17 മില്യൻ ടൺ (46 ശതമാനം) ഇന്ത്യയിൽനിന്നുള്ളതാണ്. തൊട്ടുപിന്നിൽ ഇന്തൊനീഷ്യ, ചൈന, മെക്‌സിക്കോ തുടങ്ങിയ രാജ്യങ്ങളാണ്.
കേരളത്തിൽ ഏകദേശം 75,900 ഹെക്ടറിൽ മാവ് നട്ടുവളർത്തുന്നതായാണ് കണക്ക്.
ഏകദേശം 3,23,500 ടൺ മാങ്ങ കേരളത്തിൽ ഉല്പാദിപ്പിക്കപ്പെടുന്നുവെന്ന് കണക്കാക്കിയിട്ടുണ്ട്. മാവ് ഗാർഹിക വിളയായാണ് കേരളത്തിൽ കണക്കാക്കുന്നത്.
കേരളത്തിൽ വാണിജ്യാടിസ്ഥാനത്തിലുള്ള ഏറ്റവും വിപുലമായ മാവുകൃഷി ഉള്ളത് പാലക്കാട് ജില്ലയിലാണ്
നാട്ടുമാവുകൾക്ക് എന്തുപറ്റി?
നാട്ടുമാമ്പഴങ്ങൾക്ക് നാരും മാംസളഭാഗവും രുചിയും ഒരുപോലെയുണ്ട്. കേരളത്തിലെ മാവ് സമ്പത്തിനെക്കുറിച്ച് ലോകത്തെ അറിയിച്ചത് ഹോർത്തൂസ് മലബാറിക്കൂസ് എന്ന ഗ്രന്ഥത്തിലുടെ ഹെൻഡ്രിക് ആഡ്രിയൻ വാൻ റീഡാണ്. കേരളത്തിൽമാത്രം നാട്ടുമാവുകളുടെ 1200 ൽ പരം ഇനങ്ങൾ ഉണ്ടായിരുന്നതായി ഹോർത്തൂസ് മലബാറിക്കസിൽ പരാമർശിക്കുന്നുണ്ട്. ഒരേ ഇനത്തിന് പ്രാദേശികപേരിൽ ചിലപ്പോൾ വ്യത്യാസം ഉള്ളതുകൊണ്ടായിരിക്കാം ഈ സംഖ്യ ഇത്രയും
വലിയതായത്. ഏതായാലും കേരളത്തിലെ നാട്ടുമാവുകളുടെ വൈവിധ്യം എടുത്തുപറയേണ്ടതു തന്നെയായിരുന്നു.
എന്നാൽ ഇവയ്ക്ക് വംശനാശം വന്നുകൊണ്ടിരിക്കുന്നുവെന്നത് ഒരു വസ്തുതയാണ്. വംശനാശത്തിന്റെ കാരണങ്ങൾ പ്രധാനമായും ചുവടെ ചേർത്തവയാണ്. 1940 നു ശേഷം റബ്ബർ കൃഷിയുടെ വ്യാപനത്തിനായി കുന്നുകളും മേടുകളും വെട്ടിവെളുപ്പിക്കപ്പെട്ടു. അക്കൂട്ടത്തിൽ ധാരാളം നാട്ടുമാവുകളും പെടുന്നു.
വിറകാവശ്യങ്ങൾക്കുവേണ്ടി വ്യാപകമായി വെട്ടിയതിലും പ്രഥമസ്ഥാനം നാട്ടുമാവുകൾക്കായിരുന്നു.
നാട്ടുമാവുകളുടെ സംരക്ഷണത്തിന് സർക്കാരോ കൃഷിവകുപ്പോ പ്രത്യേക പദ്ധതികൾ തയ്യാറാക്കുകയോ നാട്ടുമാവ് പ്രോത്സാഹന നടപടികൾ സ്വീകരിക്കുകയോ ചെയ്തില്ല.
പുരയിടങ്ങൾ തുണ്ടുവത്കരിക്കപ്പെട്ടപ്പോൾ നാട്ടുമാവിന് വളരാൻ ഇടമില്ലാതായി. പകരം ഒട്ടുമാവുകൾ സ്ഥാനം പിടിച്ചു.
പെട്ടെന്ന് കായ്ക്കണമെന്ന ചിന്തയിൽ നാട്ടുമാവുകളെ ഒഴിവാക്കുന്ന സാമൂഹ്യസമീപനം വ്യാപകമായി.
നാട്ടുമാവുകളുടെ പ്രാധാന്യം തിരിച്ചറിയാത്ത കേരളീയസമൂഹം അവയുടെ സംരക്ഷണത്തിനായി കാര്യമായൊരു ഇടപെടലും നടത്തിയില്ല. സങ്കരയിനങ്ങളുടെയും വിദേശ ഇനങ്ങളുടെയും വരവോടെയാണ് വീട്ടുമുറ്റങ്ങളിൽനിന്ന് നാട്ടുമാവുകൾ അപ്രത്യക്ഷമായത്.
നാട്ടുമാവുകൾ 150 മുതൽ 300 വർഷം വരെ നിലനില്ക്കുമ്പോൾ ശരാശരി 35 വർഷം മാത്രമാണ് ഒട്ടുമാവുകളുടെ ആയുസ്സ്. കാലാവസ്ഥ അനു
കൂലമായാൽ നാട്ടുമാവിൽ ഓരോ തവണയും ആയിരക്കണക്കിന് മാങ്ങ ഉണ്ടായിരിക്കും. സങ്കര ഇനങ്ങളിലാകട്ടെ, നാട്ടുമാവുകളെ അപേക്ഷിച്ച് കുറഞ്ഞ അളവിൽ മാത്രമാണ് മാങ്ങ ഉണ്ടാവുക
ലോകമെങ്ങും അതുതന്നെ സ്ഥിതി
നാട്ടുമാവുകൾക്ക് കേരളത്തിൽ മാത്രമല്ല, ലോകത്താകെ സംഭവിച്ചുകൊണ്ടിരിക്കുന്ന നാശവും ചെറുതല്ല. ഇന്റർനാഷനൽ സൊസൈറ്റി ഫോർ ഹോർട്ടിക്കൾച്ചർ സയൻസസ് സംഘടിപ്പിച്ച 2019 ലെ അന്താരാഷ്ട മാങ്ങ സിമ്പോസിയത്തിൽ ഇതൊരു പ്രധാന ചർച്ചാവിഷയമായിരുന്നു. ഓരോ വർഷം പിന്നിടുമ്പോഴും ഇരുപതിലേറെ നാട്ടുമാവുകളുടെ ഇനങ്ങൾ ലോകത്തുനിന്ന്‌നഷ്ടപ്പെടുകയാണെന്ന് മേൽ സൂചിപ്പിച്ച അന്താരാഷ്ട്ര സിമ്പോസിയം വിലയിരുത്തി. രുചി, മണം, ആകൃതി, നിറം, ഉല്പാദനക്ഷമത എന്നിവയിലുൾപ്പെടെ വൈവിധ്യമുള്ള മാവുകൾ ഭൂമിയിൽ ധാരാളം ഉണ്ടായിരുന്നു. ഇവയിൽ ഒരെണ്ണംപോലും നഷ്ടമാകന്നത് നികത്താനാവാത്ത ജനിതകനഷ്ടവും രുചിനഷ്ടവുമാണുണ്ടാക്കുക. നാട്ടുമാവിനങ്ങളെ സംരക്ഷിക്കാനും പ്രോത്സാഹിപ്പിക്കാനും ധാരാളം ചെറുഗ്രൂപ്പുകൾ ലോകത്തെമ്പാടും രൂപംകൊണ്ടിട്ടുണ്ട്.

 

 

 

 

 

നാട്ടുമാവ് സംരക്ഷണശ്രമങ്ങൾ
സംസ്ഥാനത്ത് നാട്ടുമാവ് സംരക്ഷണ ശ്രമങ്ങൾ അടുത്തകാലത്ത് സജീവമായിട്ടുണ്ട്. കേരള കാർഷിക സർവകലാശാല ഇക്കാര്യത്തിൽ അഭിനന്ദനീയമായ മുൻകൈ എടുത്തിട്ടുണ്ട്. അന്യംനിന്നുപോകുന്ന മാവുകളെപ്പറ്റിയുള്ള ഗവേഷണപ്രവർത്തനങ്ങൾക്ക് കാർഷിക സർവകലാശാലയിൽ തുടക്കംകുറിച്ചിട്ടുണ്ട്. കേരള
ത്തിലെ നാട്ടുമാവുകളെ സംരക്ഷിക്കുന്നതിനായി ചില ഫെയ്‌സ്ബുക്ക് കൂട്ടായ്മകളും സജീവമായി പ്രവർത്തിക്കുന്നുണ്ട്.നാട്ടുമാവുകൾക്ക് ആഴത്തിൽ വളരുന്ന തായ്
വേരുള്ളതിനാൽ കൊടുങ്കാറ്റുപോലുള്ള പ്രതികൂല സാഹചര്യങ്ങളെ അതിജീവിച്ചു വളരാനുള്ള പ്രത്യേക കഴിവ് അവയ്ക്കുണ്ട്. മാത്രമല്ല, കേരളത്തിലെ കാലാവസ്ഥയിൽ നന്നായി വളരാനും കായ്ക്കാനും ഇവയ്ക്കുകഴിയും. നാരും മാംസളഭാഗങ്ങളും വൈവിധ്യമാർന്ന മണവും രുചിയുമുള്ള നാട്ടുമാവുകളെ നിലനിർത്താൻ കൂട്ടായ ശ്രമങ്ങൾ അത്യാ
വശ്യമാണ്. നാട്ടുമാവിനങ്ങളെ അവയുടെ വിത്ത് ഉപയോഗിച്ച് നട്ടുവളർത്തുന്നതോടൊപ്പം തനതുസ്വഭാവമുള്ള സങ്കരയിനങ്ങൾ വികസിപ്പിച്ചെടുക്കുന്നതിനായി പ്രത്യേക ഗുണങ്ങളുള്ള നാട്ടുമാവിനങ്ങൾ ഉപയോഗപ്പെടുത്തുക എന്നരീതിയും പ്രയോജനപ്പെടുത്താവുന്നതാണ്.
(ഹരിത കേരളം മിഷൻ കണ്ണൂർ ജില്ലാ കോർഡിനേറ്ററാണ് ലേഖകൻ)


കെടെറ്റ് പരീക്ഷ നടത്താതെ പിഎസ് സി അപേക്ഷ: ഉദ്യോഗാർത്ഥികൾ വെട്ടിൽ
കണ്ണൂർ
ടെറ്റ് പരീക്ഷ നടത്താതെ ഹൈസ്‌കൂൾ ടീച്ചേഴ്‌സ് സോഷ്യൽസയൻസ് അപേക്ഷ പിഎസ് സി ക്ഷണിച്ചത് ഉദ്യോഗാർത്ഥികളെ ബുദ്ധിമുട്ടിലാക്കുന്നു. ജൂലൈ ഏഴാം തീയതിയാണ് അപേക്ഷിക്കാനുള്ള ലാസ്റ്റ് തീയതി. കേരള ടീച്ചേഴ്‌സ് എലിജിബിലിറ്റി ടെസ്റ്റ് അപേക്ഷയും ഇതിനു മുന്നേ ക്ഷണിച്ചിട്ടുണ്ട്. മൂന്ന് തവണയായി അപേക്ഷിക്കാനുള്ള തീയതി ജൂൺ 12 വരെ നീട്ടി കൊടുത്തു. പരീക്ഷ എപ്പോഴാണ് നടക്കുക എന്ന് പോലും അറിയില്ല. എച്ച് എസ് എ അപേക്ഷിക്കാൻ കെ ടെറ്റ് യോഗ്യത ഇല്ലാത്തവർക്ക് സാധിക്കുകയുമില്ല. പി എസ് സി, എച്ച് എസ് എ അപേക്ഷ നീട്ടുകയാണെങ്കിൽ പ്രായപരിധി കഴിയുന്ന കുറെ ഉദ്യോഗാർത്ഥികൾക്ക് പ്രയോജനം ആയി തീരും. ഇനിയൊരു അപേക്ഷ വിളിക്കണമെങ്കിൽ വർഷങ്ങളെടുക്കും. പ്രായപരിധി കഴിഞ്ഞവരുടെ ജോലി സാധ്യതകൾ മങ്ങും. കെടെറ്റ് പരീക്ഷ എത്രയും പെട്ടെന്ന് നടത്തി റിസൾട്ട് പ്രസിദ്ധീകരിച്ചാൽ അത് ഉദ്യോഗാർത്ഥികൾക്ക് പ്രയോജനപ്പെടും. അല്ലെങ്കിൽ എച്ച് എസ് എ സോഷ്യൽ സയൻസ് അപേക്ഷിക്കാനുള്ള തീയതി നീട്ടി നൽകി ഉദ്യോഗാർത്ഥികൾക്ക് അവസരം നൽകണമെന്നാണ് അവരുടെ ആവശ്യം.

 

Most Read

  • Week

  • Month

  • All